1
ዎሉ አጀብሲሰኖ መላተ ሰማን ለዕዮም፤ ሁኩንን መገን ኡሙዕርት ጎፋ መጨረሽ ለመለ በለተ አፎ ለመለ መላይከተ ለዕዮም።
2
ህከኒች ኤተሮን ጊራን ልቀለቀሞ ለአቃንች ባረ አጉደኖሃ ለዕዮም፤ ህትን ቡሳውችለከ ቡሳውች ምስለ፥ ሱዕምስ ዎሊንሽ መላተ ድለ አቶረ ለዕዮም፤ መገኑ ኣሴሰ ክራረ አፍ ህከን ቡርጩቅ ባር መዴን ኡርቶኢሃ ለዕዮም።
3
እሰን መገን ካድንቾ ሙስ መዝሙረለከ ሆልች መዝሙረ «ጉዕመንከ አታልታንት ቀርቾ መገኖ! ሆጉክ ሎረተለከ አጀብሲሳእታን፤ ጉዕማንከ ኡመት ዎመ! ዎቆክ ጌጥዬሃለከ ሀንቅሃን።
4
ቀርቾ! ኬሳሃ ዋጅባሁለከ ሱዕመክ ከበጅባሁ አዬት? መሰንትስ ጠሊሉ ጠለዕል አቴት፤ ሀንቅ ፍርዱክ ለሌቤቺሃ ኡመቱ ጉዕሙንኩ አሜች ብሬንከክ ሰገዳአ» ይተን ዘመርታ እቅ።
5
ህከኒች ኤተሮን ምስክር ዱካኑ ሁኩንን መገን ምኑ ሰማን ፈንተዕያን ለዕዮም።
6
ህከ ለመለንከ በለተ አፎ ለመሉንኩ መላይከት መገን ምኒች ፉልቶኡ፤ ነጠተ በለቃ ዋጁተ ኦድኑተ ኦደኦ እቅ፤ ወዘነሰ ዎርቅ ቀበቶን ቆዕርቶ እቅ።
7
ሾሎንከ ክልቀቲች መቱ ለመለንከ መላይኬቺሃ ዘላለሚች ዘላለመ ኢለ ሄአኖ መገን ኡሙዕርት ዊንቶ ለመለ ዎርቅ ጠበትተ ኣሴሰ።
8
መገን ኬዕምኚችለከ ዎልቃች ፉልታ ዉሊልት ዱእ ምኒ ዊሞ፤ ሁኩ ለመሉንኩ መላይከት አፎ ለመሉንኩ በለት እሆተ ኢለ አዪሁ ዱእ ምኒ ኣጎተ አታሎበአ።